Sajos

Sámekulturguovddáš Sajos lea Sámeeatnama váimmus, gasku Anára gili. Báikkálaš olbmuid guollevuorkán gohčoduvvon Juvdujohka, meahcceguovllu Anárjávri, mystihkalaš Ohcomaš ja Anára máŋggabealat vánddardanguovlu addet fiinna rámaid Anárii, mii lea dovddus Suoma sámekultuvrra guovddážin.Sajos15

Geavaheaddjit

Sámekulturguovddáš Sajosis leat doaibmalanjat Sámediggái, sámekultuvrai gulavaš máŋggabealat doaimmaide ja maiddái sámi oahpahus- ja dutkandoibmii. Dáid lassin guovddáža dehalaš doaibmasajit leat oktasašlanjat: loaiddastan-, čoahkkin- ja máŋggadoaimmalanjat ja restoráŋŋa, mat leat sajuštuvvan máŋggadoaimma- ja bálvalusfeaskára birra. Oktasašlanjaid geavaheapmi lea kulturguovddáža buot doaimmaid dehalaš oassi.

Sámekulturguovddáš lea ovdasajis dárkkuhuvvon sámiid iežaset geavaheami várás. Das šaddá Suoma sámiid iešráđđema ja maiddái ealli ja ovdáneaddji sámekultuvrra symbola, man guovddáš doaibman lea sihke gáhttet árbevirolaš kultuvrra ja maiddái ovddidit ja ođasmahttit sámi servodateallima.

Váldodárkkuhusa lassin kulturguovddáš fállá viiddis, ođđaáigásaš ja alladását oktasašgeavahanlanjaid (čoahkkin-, auditorio-, máŋggadoaimma- ja loaiddastansajiid ja studiolanjaid) dihte erenomáš vejolašvuođaid lágidit áidnalunddot birrasis máŋggalágan čoahkkimiid, konfereanssaid ja dáhpáhusaid.

Sámekulturguovddáš lea dasto seamma áigge nu Suoma sámiid parlameantadállu go kultur-, skuvlen- ja máhttinguovddáš ja maiddái dáhpáhusdállu iešguđetlágan čoahkkimiiguin, musihkka-, filbma- ja teáhterloaiddastemiiguin. Nuppiide laktásan oassedoaimmat dorjot nuppiideaset sisdoaluid ja lanjadagaid beales.

Sámekulturguovddáš Sajosa váldoláigolažžan doaibmá Sámediggi, mii láigoha lanjaid eará geavaheaddjiide. Sámi oahpahusguovddáš lea Sámedikki lassin dálu nubbi váldogeavaheaddji. Dálu eará geavaheaddjit leat Anára gieldda girjerádjodoaibma, Sámi Duodji rs (sámeduojáriid searvi), SámiSoster rs (sámiid sosiála- ja dearvvasvuođasuorggi searvi), Lappi guovlluhálddahusdoaimmahat, Sámeárkiiva ja restoráŋŋa Galla. Dálu eaiggát ja hukseheaddji lea Senaatti-kiinteistöt.